Ginkondena ni anay Presidente Rodrigo Duterte ang pamaagi kag pwersa sang pulis nga gingamit sang ginserbe ang warrants of arrest batok kay Kingdom of Jesus Christ leader Pastor Apollo Quiboloy kag iban pa nga mga kaupdanan sini sa Davao City.
Suno sa anay presidente, sobra-sobra kag indi kinahanglanon ang pwersa sang otoridad nga indi man gani taga-Davao. Natabo pa ini suno sa iya sa simbahan kag sa school premises — bagay nga iya ginlaragway nga indi gid niya mabaton.
“I strongly condemn the use of excessive and unnecessary force in serving the warrant of arrest for Pastor Apollo C. Quiboloy of the Kingdom of Jesus Christ by police officers who are not even from Davao City. This incident occurred within a place of worship and on school premises, which is absolutely unacceptable,” suno kay Duterte.
Gintawag man sini nga “overkill” ang natabo kag ginwestyon kun amo bala ini ang mangin paagi sang Marcos administration sa pag-uyat sa mga indibidwal nga naakusaran pa lamang sang krimen kag wala pa gani napamatud-an kun guilty sa kaso.
Ginkwestyon man sini kun paano magarantiya sang administrasyon nga mapabilin ang kinamatarong sang mga Pilipino kun ang pinaka-importante gani sa sini nga mga kinamatarong ang ginatapak-tapakan lamang kag ginalapas sang otoridad.
“Will this overkill be the trademark of this administration when dealing with individuals who are merely accused of committing a crime and have not been proven guilty beyond reasonable doubt?
Will they exhibit the same lack of self-restraint they have shown towards critics of this administration when dealing with their supporters?,” dugang sa statement.
Kahapon, Hunyo 10, sang ginsulod sang ginabanta 100 ka mga pulis sa pagpanguna sang armado nga mga operatiba sang Special Action Force kag Criminal Investigation and Detection Group ang mga propiedad ni Quiboloy apang napaslawan man sila nga maaresto ang self-proclaimed Appointed Son of God kag ang iya kaupdanan.
Ang mga compound nga ginsulod ang nahamtang sa Davao City, Samal Island, kag Sarangani.
Nangin mataas ang tension pasado 3:00 sa kaagahon sang naggamit na ang raiding team sang hagdanan kag ginsaka ang pader sang main compound sang Kingdom of Jesus Christ sa Diversion Road sa Davao City.
Ginpahayag nga nag-conduct pa sang body search sa mga tawo nga yara sa sulod sang compound.
Duha man ka helicopters nga ginapatihan may sakay nga mga pulis ang naglibot-libot sa ibabaw sang compound samtang padayon ang raid apang wala man nakahugpa bangud sa obstructions nga ginpangbutang sa area lakip na ang mga salakyan.
Ginaalegar nga may mga workers man sa simbahan nga nasamaran kadungan sang raid kag subong naga-preparar na sang legal action batok sa nag-raid.
Nahibaluan nga wanted si Quiboloy bangud sa mga kaso nga child abuse, sexual abuse kag qualified trafficking nga na-file sa korte sa Davao kag Pasig.
