Nagtimalos ang Lebanese armed group nga Hezbollah paagi sa drone kag rocket attack nga nag-target sa mga base-militar sang Israel.
Ini nga tikang sang Hezbollah amo ang pinakadaku nga atake nga nahimo sang kaalyado sang Iran halin sang natabo ang Israel-Hamas war. Ginakahangaw-an man nga magresulta sini sa all-out war sa tunga sang Tel Aviv kag amo nga grupo.
Suno pa sa Hezbollah, ang ila pag-atake sa northern Israel ang kabahin sang ila pagtimalos matapos napatay ang ila senior commander nga si Taleb Abdullah ukon si Abu Taleb bangud sang air raid sang Israeli military sa Jouaiya sa southern Lebanon sini lang nga semana.
Naggamit ang Lebanese group sang 150 rockets kag 30 explosive drones agud nga iguon ang 15 ka Israeli positions lakip na sa Golan Heights.
Base sa inisyal nga reports halin sa Israel, duha ang pilason kag nagluntad ang 15 ka insidente sang sunog bangud sa rockets. Gin-report naman sang Israeli military nga na-intercept nila ang madamo nga rockets apang may iban nga nagtuga sang sunog. Ginkumpirma man nga wala sang casualties sa atake sang Hezbollah.
Nahibaluan nga halin sang nagsugod ang gyera sa Gaza sang Oktubre 2023, may binalusay man sang lupok sa border sang Israel kag Lebanon. Ginrason sang Hezbollah nga nagahulag sila pabor sa Hamas nga pareho sa ila, gina-kabig man sang Israel, UK, kag iban pa nga pungsod bilang mga terorista nga organisasyon.
