ILOILO CITY – “Try, try and try again until you succeed.”
Ini ang ginapamatud-an sang isa ka barbero nga apat ka beses nga nagkuha sang Licensure Examination for Professional Teachers antes nakapasar sa pasinawan.
Sa interview sang Bombo Radyo kay Mr. Eduardo Laserna, 50, residente sang Barangay Tanza Esperanza, City Proper, iya ginpahayag nga bangud sa kapigaduhon, 13 ka tuig ini nga nag-eskwela sa kolehiyo.
Nagkuha ini sang kurso nga Bachelor of Science in Secondary Education sa PHINMA University of Iloilo.
Suno kay Laserna, ang handom sini sadto, amo nga mangin isa ka pulis, apang lain ang nangin dalagan sang iya kapalaran.
Una na ini nga nagkuha sang mga kurso nga Bachelor of Science in Marine Engineering, Bachelor of Science in Mechanical Engineering kag Bachelor of Science in Criminology, apang wala niya ini tanan matapos.
Sang tuig 2005, nagkuha siya sang kurso nga Bachelor of Science in Secondary Education kag tuig 2018 na sang naka-graduate.
Sang amo nga tion, may yara na ini sang asawa kag mga kabataan.
Agud may inug-gasto sa iya pagtuon kag sa iya pamilya, nangin barbero si Laserna.
Subong nga tuig, nakapasar na si Laserna kag nagalaom nga mangin isa na ka manunudlo.
