Ginapa-deport sang Presidential Anti-Organized Crime Commission (PAOCC) ang 156 ka foreign nationals nga nag-trabaho anay sa Philippine Offshore Gaming Operator (POGO) hub sa Porac, Pampanga.
Sa memorandum nga pirmado ni Executive Secretary Lucas Bersamin, nagpaguwa sang order ang komisyon sa Bureau of Immigration nga i-expel ang POGO workers sang Lucy South 99 Corp. kag i-blacklist sila para nga indi na liwat makasulod sa Pilipinas.
Ginmanduan man ang Anti-Money Laundering Council nga i-freeze ang assets sang Lucky South 99 Corp. nga nagalakip sang 46 buildings sa compound kag mga salakyan nga naga-park man sa vicinity sini.
Antes sini, ginpahayag sang otoridad nga may POGO workers nga nakapalagyo bangud sa posible nga government insider nga nagpahibalo nga may himuon nga raid. May ginlunsar naman nga internal investigation kaangot sa amo nga isyu.
Sa masobra 150 ka foreign nationals nga nadakpan, 126 ang Chinese, samtang ang iban naman ang ginalakipan sang Vietnamese, Malaysian, Myanmar kag Korean.
Nahibaluan nga ang raid sa Lucky South 99 ang nag-resulta sa pagkatukib sa gina-alegar nga torture room kag mga ebidensya sang “love scam” operations.
