Ginpasalig sang Bureau of Animal Industry (BAI) sang Department of Agriculture (DA) nga naga-conduct ini sang maid-id kag masangkad nga surveillance kag magabakal sang dugang nga polymerase chain reaction (PCR) reagents para ma-test ang ginasuspetsahan nga mga kaso sang Q fever.
Ini kasunod sang kumpirmasyon nga nakasulod na ini nga balatian sa pungsod partikular sa government breeding station sa Marinduque.
Ang resulta sang confirmatory tests ang nagguwa sang Myerkules kag ginsapubliko kahapon, Hunyo 21.
Suno sa National Veterinary Quarantine Services Division, nagapanguna subong sa prayoridad amo ang health kag safety sang mga sapat kag tawo. Ginpasigurado man sang talatapan ang hugot nga monitoring kag paghimo sang nagakaigu nga tikang agud makontrol ang mga kaso.
Ang Q fever isa ka zoonotic disease nga tuga sang bacteria nga Coxiella burnetii nga naga-infect sa mga kanding, karnero, kag baka.
Sa Marinduque, gin-depopulate na ang masobra lima ka dosena nga kanding nga gin-import halin sa Estados Unidos sang Amerika amo man ang iban nga mga sapat sa pasilidad. Ginpatay ini nga imported goats sa quarantine facility sa Pampanga antes pa man ang pag-conduct sang tests.
Suno sa United States-Centers for Disease Control and Prevention, mahimo man mainfect sang Q Fever ang mga tawo kun mahaklo ang yab-ok nga nakontamina na sang infected nga higko sang sapat, ihi, gatas, kag birth products.
Ang sintomas nga makit-an sa tawo nga na-infect na sang sini nga balatian ang makit-an duha tubtub tatlo ka semana matapos ang exposure. Masami ini nga non-specific kag mild kag nagalakip sang hilanat, pagpalangapoy, pagpalanakit sang ulo, pag-ubo, pagbatyag sang pagkahilo, kag pagsuka.
Kasunod sini, temporaryo nga gin-ban sang DA ang importasyon sang kanding halin sa US. Ginsuspend man ni Agriculture Secretary Francisco Tiu Laurel Jr. ang mga BAI personnel nga involved sa importation samtang pending ang imbestigasyon. Ginmandu man ang pag-review sang existing protocols kag potential blacklisting sang goat importer halin sa amo nga pungsod.
