Nag-abot na sa South Korea ang aircraft carrier sang Estados Unidos sang Amerika para sa natalana nga joint military drills agud nga mabatuan ang mga pagpamahog sang North Korea.
Natabo ini isa ka adlaw matapos ginpatawag sang South ang Russian ambassador to Seoul agud nga pamatukan ang bag-o nga agreement nga ginpirmahan nanday President Vladimir Putin kag Kim Jong Un sa Pyongyang sang nagligad nga semana kun sa diin nakasaad nga magabuligay ang Russia kag ang North Korea kun may pagpang-atake sa ila.
Suno naman sa South Korean Navy, ang pag-abot sang US aircraft carrier nga Theodore Roosevelt sa Busan Naval Base ang naga-demonstrar sang mapag-on nga kumbinasyon sang depensa sang South Korea kag Estados Unidos kag ang ila mabaskog man nga commitment nga magbalos sa anuman nga pagpamahog halin sa Pyongyang.
Pito ka bulan na ang nagligad, nag-abot man anay sa South ang isa pa ka US aircraft carrier nga USS Carl Vinson bilang pagpakita man sang pwersa batok sa North.
Subong nga bulan natalana ang joint exercises nga pasakupan sang US, South Korea, kag Japan — bagay nga ginapakamalain sang North kag ginatawag nga rehearsal para sa invasion.
