ILOILO CITY -Ginbuyagyag ni Iloilo City Mayor Jerry Treñas nga gintanyagan ang Iloilo City nga pahamtangan sang Philippine offshore gaming operator (POGO) hub.
Ini ang ginkumpirma sang alkalde kasunod sang ginpatigayon nga mga raid sang Presidential Anti-Organized Crime Commission (PAOCC) sa Bamban, Tarlac kag Porac, Pampanga.
Sa interview sang Bombo Radyo kay Treñas, iya ginpahayag nga may nag-istorya sa iya nga Chinese businessmen natuhoy sa nasambit nga plano.
Apang suno kay Treñas, ginbasura niya ang nasambit nga tanyag bangud indi manami ang epekto sini sa syudad.
Suno sa alkalde, ang estilo sang POGO amo ang pagdala sang ila kaugalingon nga mga empleyado, equipment kag mangin ang ila mga ‘babaye’ ukon mga sex workers.
Ginpahayag ni Treñas nga maguba ang maayo nga imahe sang syudad sa tion nga may yara sang POGO hub.
