Nagpahayag sang suporta ang grupo sang mga retirado nga opisyal sang Armed Forces of the Philippines (AFP) para sa gilayon nga pagpasirado sang Philippine Offshore Gaming Operators (POGO) hub sa bilog nga Pilipinas.
Sa interview sang Bombo Radyo kay retired Vice Admiral Emilio Marayag Jr., presidente kag board chairman sang Association of Generals and Flag Officers, Inc., iya ginpahayag nga mahimo mabutang sa alang-alang ang seguridad sang komunidad kag makaguba ini sa pagtinguha sang gobyerno nga tapnaon ang korapsyon.
Suno kay Marayag, ginagamit sang madamo nga mga POGO outlets ang mga organized crime groups para sa mga ilegal nga aktibidad kaangay sang human trafficking, prostitution, kidnapping, cybcer scam, illegal drug trade, torture, surveillance kag cyberattack sa mga ahensiya sang gobyerno kag iban pa nga nagapamalabag.
Ginpahayag man sini nga ang nasambit nga tikang ang pamahog sa values kag seguridad sang mga Pilipino nga amo ang nagtulod sa grupo nga ipanawagan sa pila ka mga mamalidha nga i-ban ang POGO.
Dugang pa ni Marayag, wala lang ini nagaapekto sa income, pag-uswag kag mga oportunidad sa investment sang mga lehitimo nga gaming sites kaangay sang casino, kundi nagatuga man ini sang negatibo nga imahe sa gambling nga nagabalabag sa mga manughampang nga ikonsidera ang legal gambling establishments.
Matandaan nga sang nagligad nga bulan, ginsalakay sang Presidential Anti-Organized Crime Commission (PAOCC) ang pila ka mga POGO hubs sa pungsod lakip na sa banwa sang Bamban sa Tarlac kag Porac sa Pampanga bangud sa alegasyon sang human trafficking, serious illegal detention kag scam operations.
