Natalana nga magbalik diri sa pungsod kag mag-atubang sa sampaw-sampaw nga mga kaso ang anay mamalidha sang Negros Oriental nga si Arnolfo “Arnie” Teves, Jr. matapos nga gin-aprubahan sang Timor Leste ang extradition request sang gobyerno sang Pilipinas.
Ginkumpirma ini ni Department of Justice (DOJ) spokesperson Assistant Secretary Mico Clavano pila ka adlaw matapos gin-anunsyo nga gin-release na sa house arrest ang anay kongresista apang hugot gihapon nga ginabantayan agud indi makaguwa sa Dili.
“The DOJ confirms the grant of the extradition request made by the Philippine government. The information was relayed to us by the Attorney-General of Timor-Leste. We have won,” suno kay Clavano.
“We look forward to the arrival of Mr. Teves so that he may finally face the charges against him in our local courts,” dugang pa sang Justice official.
Wala pa sang ginpaguwa nga impormasyon ang DOJ kaangot sa petsa sang pag-abot ni Teves.
Si Teves ang nagapangatubang sang kaso nga murder bangud siya ang ginatudlo nga mastermind sa pagpapatay kay anay Negros Oriental Governor Roel Degamo sang Marso 4, 2023.
Sulit-sulit nga ginpanginwala ni Teves ini nga alegasyon kag ginrason nga wala siya sa pungsod sang tion nga natabo ang pagpatay kay Degamo. Halin sang amo nga petsa, wala nakapauli si Teves diri sa Pilipinas.
Magluwas sa ginaalegar nga involvement sa Degamo massacre, ginkasuhan man si Teves bangud sa ginaalegar pagpatay sa tatlo ka iban pa nga mga tawo sa Negros Oriental sang 2019. Sa kasagsagan sini nga mga kaso, ang kongresista kag ang 12 ka iban pa nga mga tawo ang gin-designate sang Anti-Terrorism Council bilang “terorista” bangud sa ginaalegar pagpamatay kag pagpang-harass sa Negros Oriental.
Agusto 2023 naman sang ginsipa ini halin sa Kamara bangud sa padayon nga pag-absent sa trabaho apisar sang iya nga expired na nga travel authority.
