Gina-imbestigaran na sang Presidential Anti-Organized Crime Commission (PAOCC) ang reports nga may foreigners nga nagapangbakal kag naga-arkila sang mga duta sa Pilipinas nga ginalantaw pamahog man sa food security sa pungsod.
Suno kay PAOCC Undersecretary Gilbert Cruz, sa inisyal nga mga impormasyon, nagakatabo ini sa Palawan, Nueva Ecija, kag mga probinsya kun sa diin mayor gid nga produkto ang bugas.
Suno pa sa natungdan, masami nga nagatupa sa P80,000 tubtub 100,000 ang ila ginabayaran sa gina-arkilahan nga duta.
“Let’s say yung mga dayuhan na yun magtanim ng bigas, kung lahat po ng pinagtataniman natin ng bigas inuupahan nila, sila na ang magko-control ng presyo ng bigas… Baka ma-control na nila ang food security natin,” pahayag sini.
Gindugang man sang anti-crime body nga magapakig-angot sila sa Department of Agriculture kag Department of the Interior and Local Government agud nga malantaw ini nga isyu.
Nahibaluan nga sa idalom sang Konstitusyon, limitado lamang ang pagpanag-iya sang pribado nga mga duta sa mga Pilipino ukon sa mga korporasyon kun sa diin nagapanag-iya ang mga Pilipino sang at least 60 percent sang capital stock.
Antes ang statement sang PAOCC, nagpanawagan man si Bishop Broderick Pabillo sa national government nga maglunsar sang imbestigasyon sa ginaalegar pagbakal sang foreigners sang duta sa Taytay, Palawan nga malapit sa West Philippine Sea.
Ginpahayag ni Pabillo, Apostolic Vicar sang Taytay, nga posible nga involved diri ang Chinese nationals kag ila nga mga ahente.
“Baka mga Chinese ito. O baka mga agents ng mga Chinese. May mga namimili ng lupa. Lalong lalo na ‘yung facing the West Philippine Sea. Coastal area kami and we are facing the West Philippine Sea,” pahayag sini. “Dapat tignan, imbestigahan iyong mga namimili ng mga lupa kasi syempre gagamitin ng mga dummy ‘yan. May pera na ibinibigay kaya hindi ko alam kung paano ang pag-iimbestiga doon kung legit ba talaga ‘yung pagbili ng lupa.
Sa website sang local government, nahamtang sa Taytay ang Malampaya Sound ukon ang ginabansagan nga “fish bowl” sang Pilipinas. Ini nga area sa Palawan ang naga-contribute sang daku sa national marine product market partikular sa fish production kag naga-suplay man sang isda sa mga merkado sa Metro Manila kag mangin sa Hong Kong, Taiwan, kag Japan.
