Nagpanawagan ang China sa Estados Unidos sang Amerika nga indi pag-i-tolerar kag suportahan ang ila ginapahayag nga pagpang-garit-garit sang Pilipinas sa isyu sa West Philippine Sea.
Ginpahayag ini ni Chinese foreign ministry spokesperson Mao Ning matapos nga nagpaguwa man si US Secretary of State Kurt Campbell sang statement nga nagapabutyag sang kahangawa sa ginapang-himo sang China sa amo nga teritoryo.
Suno kay Mao, sa baylo nga tolerahon sang U.S. ang Pilipinas, dapat nga maghimo ini sang praktikal nga mga tikang agud mabantayan ang kalinong kag estable nga kondisyon sang amo nga kadagatan.
“The United States should stop condoning and supporting the Philippines’ provocations and nuisance and take practical actions to safeguard peace and stability in the South China Sea,” statement ni Mao.
Sa regular briefing, gindugang pa sang Chinese official nga gintalikdan sang Pilipinas ang kasugtanan sini sa China kag ginahangkat pa ang soberanya kag territorial integrity sang Beijing paagi sa pagdala sang construction materials sa warship nga BRP Sierra Madre sa Ayungin Shoal.
Antes ini nga statement sang opisyal sang China, ginplastar naman sang US nga “ironclad” ukon tuman ka pag-on ang defense commitments sini sa Pilipinas kag nakasaad ini sa idalom sang Mutual Defense Treaty (MDT) nga pirmado sang duha ka mga pungsod.
Suno sa US State Department, ginhambal ini ni Deputy Secretary of State Campbell sa iya tawag kay Chinese Executive Vice Foreign Minister Ma Zhaoxu.
Ini nga mga statement ang kaangot pa gihapon sa natabo sa rotation and reprovisioning (RORE) mission sa Ayungin Shoal sang Hunyo 17 kun sa diin ginbalabagan sang China Coast Guard ang mga Pilipino, ginbungguan kag ginbuslutan ang sakayan, ginpangkuha ang mga armas, ginguba ang mga equipment, kag sang ulihi, nautdan pa sang tudlo ang isa ka Philippine Navy personnel.
Gintawag man ini sang militar nga “intentional-high speed ramming” apang ginakontra sang China. Pagkatapos sang amo nga insidente, gilayon man nga nag-istorya si U.S. national security adviser Jake Sullivan sa iya Philippine counterpart nga si Sec. Eduardo Ano.
Gintawag sang Pilipinas nga ‘deliberate kag iligal’ ang ginhimo sang China, apang wala pa ini ginakabig nga armed attack, kag wala pa gina-invoke ang MDT.#
