Nagpaandam si Armed Forces of the Philippines (AFP) Chief Gen. Romeo Brawner Jr. nga gina-amat-amat naman sulod sang China ang nagkalain-lain nga sektor sa Pilipinas lakip na ang local governments kag ang media.
Ginhimo ni Brawner ini nga statement kadungan sang press briefing sa Camp Aguinaldo kasunod sang command conference nga gintambungan nanday President Ferdinand Marcos Jr., Defense Sec. Gilberto Teodoro, kag National Security Adviser Sec. Eduardo Año.
Suno kay Brawner, gina-target sang Beijing nga ma-impluwensyahan ang edukasyon, negosyo, media, kag local nga panguluhan sa Pilipinas. Ginapahayag nga ginahimo ini sang China paagi sa estratehiya nga ginatawag nga “United Front Works.”
Dugang pa sini, gina-alegar nga ginagamit sang China ang Philippine Offshore Gaming Operations (POGO) bilang istilo para makasulod sila sa Pilipinas.
Ginplastar man ni Brawner ang mga tikang sang militar agud matapna ini nga United Front Works. Lakip diri ang pagtipon sang mga impormasyon agud mahatag sa nagakaigu nga ahensya kaangay sa Bureau of Immigration kag sa Presidential Anti-Organized Crime Commission (PAOCC).
“For instance, what we did in operations against the POGO, it’s not the POGO itself because there are licensed and legal POGOs. We are targeting the illegal establishments, those that were legal POGOs but suddenly became illegal because of other activities they are doing within the confines of their structures. That’s what we are addressing,” paathag ni Brawner.
Kabahin man sang ginahimo sang AFP amo ang communication plan ukon ang kampanya nga ginatawag nga “MULAT” agud nga mapukaw ang ihibalo sang mga tawo kun ano subong ang nagakatabo sa Pilipinas.
Matandaan nga ginlunsar sang AFP ang West Philippine Sea MULAT communication plan agud ma-counter ang taktika sang China nga amo ang pagpalapta sang misinformation kag fake news.
