ILOILO CITY- Arestado ang duha ka mag-abyan sa drug buy-bust operation sa Brgy. Villa Anita, City Proper, Iloilo City.
Ang mga nadakpan amo sanday alyas Jan-jan, 32, kag alyas Dexter nga lunsay residente sang Brgy. Bo. Obrero,Lapuz, Iloilo City.
Sa interview sang Bombo Radyo kay Police Captain Ryan Christ Inot, team leader sang Regional Police Drug Enforcement Unit 6, iya ginpahayag nga pa-simple lang ang mga ini nga nagaduhol sang ginapasuni illegal nga droga nga nakasulod sa putos sang dulce kag biscuit sa ila nga mga contacts.
Suno kay Inot, nakuhaan ang mag-abyan sang 16 sachets sang suspected shabu nga may kabug-aton nga 50 grams nga may standard drug price nga P370,000.
Naglawig sang tatlo ka semana ang pag-monitor sa mga durugista antes nadakpan.
Nahibaluan nga napreso na sadto si alyas Jan-jan bangud sa kaso man nga pagduso sang iligal nga droga.
Sa subong, preso na ini sa Iloilo City Police Station 1 kag nagapangatubang sang kaso nga paglapas sa Republic Act 9165 ukon sa Comprehensive Dangerous Drugs Act of 2002.
