Ginbalabagan sang barko sang China Coast Guard (CCH) ang duha ka mga barko sang Philippine Coast Guard (PCG) malapit sa Ayungin Shoal sa West Philippine Sea.
Ini sandig sa report sang maritime expert, anay US Air Force official, kag anay defense attaché nga si Ray Powell.
Suno kay Powell, gin-punggan sang barko nga CCG 5203 ang BRP Cabra kag BRP Cape Engano nga nagalayag 14 nautical miles sa nasidlangan sang Ayungin Shoal.
Magluwas diri, may anum man ka Chinese maritime militia vessels nga nagasunod-sunod sa mga barko sang Pilipinas.
Pahayag pa sang maritime expert, ang duha ka patrol vessels sang PCG ang una na nga naka-transmit sang ila nga automatic identification signals (AIS) 18 nautical miles sa nabagatnan sang Ayungin Shoal.
Ini ang rason suno kay Powell nga nagpadala ang China sang pito ka dugang nga militia vessels agud nga magbalabag sa palibot sang Second Thomas Shoal ukon Ayungin Shoal samtang ang CCG 5203 naman ang nagkadto pa-nabagatnan.
Ginahulat pa ang kumpirmasyon sang PCG kaangot sa amo nga encounter.
Nahibaluan nga ang Ayungin Shoal nga ginatawag sang China nga Ren’ai Reef ang nahamtang 105 nautical miles sa nakatundan sang Palawan kag sulod sa 200-mile exclusive economic zone sang Pilipinas kag kabahin pa sang continental shelf sang pungsod.
Antes sini, matandaan nga ginkumpirma man sang PCG nga gin-angkla sang China ang ila Monster Ship ukon ang pinakadaku nga coast guard ship sa kalibutan sa Escoda Shoal nga malapit naman sa nahamtangan sang BRP Teresa Magbanua nga gin-deploy sang Pilipinas sa amo nga shoal agud magbantay halin pa sang Abril.
