Nagpanawagan na ang Armed Forces of the Philippines (AFP) sa mga Pinoy nga gamiton ang ila nga social media accounts agud nga batuan ang paglapta sang sala nga mga impormasyon nga naangot sa West Philippine Sea.
Suno kay AFP Spokesperson Colonel Francel Margareth Padilla, dapat nga manguna man ang mga Pilipino nga ipahibalo sa bug-os nga kalibutan kun ano gid ang matuod sa isyu sa amo nga teritoryo nga gina-claim man sang China.
“Ang panawagan natin na makatulong ang bawat isa sa ating mga kababayan na ipakalat sa mundo ang katotohanan tungkol dito sa [mga issues ng West Philippine Sea],” suno kay Padilla.
Sa idalom sang Communication Plan Mulat for the West Philippine Sea, tuyo sang militar nga mapasangkad pa ang transparency, i-counter ang nagaguwa nga disinformation, kag mas palaparon pa ang ihibalo sang publiko kaangot sa mga kinamatarong kag interes sang Pilipinas sa rehiyon.
“By enhancing public awareness and rallying patriotic sentiment, the plan aims to unite Filipinos in advocating for the nation’s interests and contributing to a more resilient Philippines,” kabahin naman sang statement sang militar.
Antes sini nga panawagan, matandaan nga una naman nagpaandam si AFP chief of staff General Romeo Brawner Jr. nga may estratehiya ang China nga ginatawag nga “united front works” sa tuyo nga matunga ang mga Pilipino. Nagpaandam man ini nga gina-amat-amat sulod sang China ang nagkalain-lain nga sektor sa Pilipinas lakip ang negosyo, eduksyon, lokal nga panguluhan, kag mangin ang media.
Mangin ang National Security Council (NSC) ang una naman nagkumpirma nga may mga tawo kag grupo nga nagapasakop pa sa ginahimo sang China nga mga naratibo kag impluwensya.
