Nag-file sang petition for certiorari sa Korte Suprema ang kampo ni suspended Bamban, Tarlac Mayor Alice Guo agud nga balabagan ang mga imbitasyon kag subpoena sang Senate Committee on Women, Children, Family Relations and Gender Equality.
Ang petition for certiorari amo ang hingyo nga i-review sang mas mataas nga korte ang desisyon sang lower court or ukon lower body.
Ang respondent sa sini nga petition amo si Senate committee chairperson Sen. Risa Hontiveros nga amo ang nagapanguna sa imbestigasyon sang Senado sa iligal nga Philippine Offshore Gaming Operation (POGO) hubs kag sa mga involvement ni Guo sa sini nga aktibidad.
Lakip man sa gin-petisyon nanday Guo amo ang pag-isyu sang temporary restraining order para nga indi na makapaguwa ang komite sang subpoena nga nagapatawag kay Guo bilang resource person sa hearings.
Matandaan nga sa una nga nag-absent si Guo sa hearing, ginrason sini ang anxiety, kag kahapon naman, Hulyo 10, ginsiling sang abogado sini nga naga-eksperyensya gihapon ini sang trauma kag indi gihapon makasipot sa Senado.
Ini nga alcalde, nga naga-guwa nga isa man ka Chinese national nga si Guo Hua Ping, ang naghingyo man sa Korte Suprema nga suguon ang komite nga untaton na ang pagpatawag kay Guo sa Senado.
Ginplastar sang mga abogado sini nga sulit-sulit na nga na-judge si Guo kag na-tag na bilang “spy”, “POGO operator”, “involved in human trafficking” kag “corrupt” public official kag maathag suno sa iya legal counsel nga nalapas na kag wala nasapak ang iya mga kinamatarong.
Ginsiling man sang kampo ni Guo nga nagkomiter na si Hontiveros sang grave abuse of discretion kag gin-violate man ang right to privacy bangud sa ginpakita sa media nga birth certificate, Statement of Assets, Liabilities and Net Worth, National Bureau of Investigation Clearance kag General Information Sheet sang registered companies.
Kahapon, sa pagtapos naman sang Senate hearing sa mga gin-raid sang Philippine Offshore Gaming Operator (POGO) hubs sa Bamban, Tarlac, kag Porac, Pampanga, naghatag naman sang paandam si Sen. Hontiveros kay Alice Guo nga indi ini mag-untat kag ipaaresto ang natungdan.
