Gin-identify sang Philippine Coast Guard (PCG) ang duha ka Chinese bulk carriers bilang “vessels of interest” kaangot sa natabo nga insidente sa Subic, Zambales sang nagligad nga semana kun sa diin isa ka Pilipino nga manugpangisda ang nagapabilin nga missing kag isa naman ang nakaluwas.
Suno kay Coast Guard spokesperson Rear Admiral Armando Balilo, ini nga Chinese vessels amo ang “Yong Fa Men” kag “Mei Lan Hu” nga ulihi nakit-an sa kadagatan nga sakop sang Adang Bay sa Indonesia.
Gina-imbestigaran sang ahensya kun ang duha ka vessels ukon isa sa ila ang responsable sa pag-igu sa fishing banca nga “John Robert” sang nagligad nga Hulyo 3 kun sa diin na-rescue ang manugpangisda nga si Robert Mondeñedo kag missing naman ang utod sini nga si Jose Mondeñedo.
Sandig sa vessel tracking system, ang duha ka vessels ang naglabay sa collision site, apang mas ginatutukan sang PCG ang Yong Fa Men base sa panugiron i Robert nga nag-tuad nga amo ini ang nagbunggo sa ila.
Nagapakig-angot naman ang Port State Control of the Philippines sa ila counterpart sa Indonesia agud nga magkuha sang dugang nga mga detalye.
Nagsulat man ang PCG sa Chinese Embassy agud nga maghingyo sa China Maritime Safety Agency nga magkooperar sa ginahimo nga imbestigasyon lakip na ang pagtumod kun nakit-an bala sang Chinese vessel ang baroto sang mga Pinoy, kun nag-untat ini, nag-likaw, ukon daw kaangay nga nag-“hit and run.”
Padayon man subong ang search and rescue operations sang BRP Sindangan kag air assets sang Philippine Coast Guard para sa missing nga Filipino fisherman.
Ginklaro ni Balilo nga ini nga insidente ang wala sang kahilabtanan sa tension sang Pilipinas kag China sa West Philippine Sea bangud malayo ini sa Bajo de Masinloc kag mas malapit sa Subic kun sa diin mas madamo nga barko ang nagalayag.
