Ginmandu na sang gobyerno ang pagpa-sirado sang public kag private universities sa Bangladesh kasunod sang lapnagon kag maduguon nga protesta batok sa kontrobersyal nga quota system sa mga trabaho sa gobyerno.
Sa amo nga protesta, anum na ka mga tawo napatay kag masobra 400 ang nasamaran.
Pila na ka mga syudad lakip na ang kapital nga Dhaka ang napuno sang tensyon sa sulod na sang pila adlaw bangud sa away sang supporters sang anti-quota movement kag ang ila kasumpong ilabi na ang student wing sang Awami League ukon mas kilala nga Bangladesh Chhatra League (BCL).
Halimbawa sang mga eksena amo ang mga estudyante nga nagasakitanay gamit ang mga balakol; mga pulis nga nagagamit na sang tear gas kag rubber bullets; kag protesters nga nagadala na sang mga lungon bilang pagpakita sang simpatiya sa mga napatay sa amo nga protesta.
Gina-demand sang protesters nga untaton na ang quota system nga nagatigana sang 30% sang government jobs sa mga pamilya sang mga beterano nga nangin kabahin sang war of independence sang Bangladesh sang 1971.
Ginapanindugan sang protesters nga indi patas kag “discriminatory” ang amo nga tikang kag ang sarang lamang makabenepisyo diri amo ang supporters ni Prime Minister Sheikh Hasina kag gusto nila ini islan sang merit-based system.
Nadabukan pa ang tensyon bangud nagpahayag ang prime minister nga ‘razakars’ ang protesters ukon katumbas sang derogatory nga Bangla word para sa tinaga nga “traidor.”
Matandaan nga ini nga quota ang ginpauntat na sang korte kasunod man sang lapnagon nga protesta sang mga estudyante sang 2018. Apang sang nagligad lamang nga bulan, nagpaguwa sang bag-o nga desisyon ang High Court sa amo nga pungsod kun sa diin ginbalik ang daan nga sistema sa quota rason nga naakig naman ang mga estudyante kag ginpadayon ang bayolente nga pagpakigbato apisar nga gin-suspinde naman ang amo nga court order.
(Photo: [Abdul Goni/AP Photo])
