Nagpaguwa sang pictures si Senator Christopher “Bong” Go agud nga balion ang social media posts kaangot sa kondisyon ni anay presidente Rodrigo Duterte.
Sa posted photos sang senador, makit-an si Duterte nga nagakaon sang prutas sa ila balay sa Davao City kag sa isa ka picture, kaupod man sini ang iya partner nga si Honeylet Avanceña samtang yara sa dining area.
Caption ni Go: “Alive and Eating! ‘Yan ang sagot ni Senator Bong Go sa mga kumalat na FAKE NEWS ngayon ukol sa kalagayan ni dating Pangulong Rodrigo Duterte.”
Sang nagligad nga bulan, matandaan nga ginpakita man sang senador ang anay presidente sa iya nga Facebook Live kasunod sang posts sa social media platforms partikular sa TikTok kun sa diin ginsaad nga napatay na ini.
Sa amo nga video, ginsiling sang former president nga nagatinir lang siya sa ila balay, naga-relax, kag retired na ini sa pulitika.
Una naman nga ginpahayag ni Go nga padayunon sini ang pagtatap kay Duterte sa iya nga personal capacity.
