Nasamaran ang ginabanta 60-anyos nga driver sang pick-up truck matapos nga nakabunggo ini sa isa ka wing van sa C1 Road nga sakop sang Barangay Pandac, Pavia, Iloilo subong nga gab-i, Hulyo 18.
Sa interview sang Bombo Radyo kay Police Master Sergeant Luther Maderse, imbestigador sang Pavia Municipal Police Station, iya ginpahayag nga base sa imbestigasyon, nang-agaw sang linya ang pick-up truck.
Nag-untat pa kuntani ang wing van apang bangud sa madasig nga dalagan sang pickup, daku man ang halit sa nauna nga parte sang salakyan kag nagasgasan pa ang driver. Wala ini sang iban nga kaupod sa salakyan.
Nagapati naman ang pahinante sang wing van nga si Christopher Sison, 18, nga posible natulugan ang driver sang pickup bangud dulu-diretso gid kag madasig ang dalagan sini.
Safe ang mga sakay sang wing van apang nagreklamo lang ang pahinante sang pagpalanakit sang dughan bangud sa mabaskog nga impact sang head-on collision.
Madasig naman sa pag-responde ang rescuers sa lugar kag gilayon nga nadala sa ospital ang driver sang pickup para madapatan sang nagakaigu nga pagbulong.
