ILOILO CITY – Ginkwestyon sang barangay officials sang Barangay Loboc, Lapuz, Iloilo City ang Iloilo City Police Office kag Traffic Enforcement Unit (TEU) bangud sang indi insakto nga pagpatuman sang ordinansa natuhoy sa illegal parking sa syudad.
Ini ang kasunod man sang natabo sa pagbunggo sang isa ka motorsiklo sa trailer truck nga illegal nga naga-park sa kilid sang dalan sa Brgy. Loboc, Lapuz, Iloilo City nga ginkamatay sang driver.
Ang biktima amo si Jessmark Gabral, 23, kag residente sang Barangay Mansaya, Lapuz, Iloilo City.
Sa interview sang Bombo Radyo kay Punong Barangay Pancho Vijuan Jr., sang Barangay Loboc, Lapuz, Iloilo City, iya ginpahayag nga sang Mayo 22 nag-request ini sa Land Transportation Office (LTO), Department of Interior and Local Government (DILG), kag sa TEU nga magpatigayon sang road clearing bangud naobserbahan sini nga madamo sang illegal parkings sa ila lugar.
Suno kay Vijuan, apisar nagpatuman sang road clearing sa iya lugar, apang wala nasipot ang tanan nga mga dalan nga ginahimo nga parking area sang mga trailer truck.
Ginpahayag niya, nga kun nagapatuman lang sang insakto kag ginhatagan sang ticket ang mga driver sang trailer truck, kuntani nalikawan ang aksidente sa lugar.
