Nagalaum si Pope Francis nga mangin palaagyan ang Olympic kag Paralympic Games agud nga maestablisar ang ceasefire sa mga pungsod nga may giyera.
Ginpahayag ini sang Santo Papa kasunod sang Angelus Prayer sa St. Peter’s Square kag pila ka adlaw antes ang pormal nga pagsugod sang Olympiada sa Paris, France.
Lakip sa na-mensyonar sini amo ang Ukraine, Palestine, Israel kag Myanmar kun sa diin iya ginpahangop nga wala sang may nagadaog sa tion nga may giyera.
“According to ancient tradition, may the Olympics be an opportunity to establish a truce in wars, demonstrating a sincere will for peace,” pahayag sini samtang ginahaylo man ang mga atleta nga mangin mensahero sang kalinong kag mangin maayo nga ehemplo sa kabataan.
“Sport also has a great social power, capable of peacefully uniting people from different cultures,” dugang pa sang Santo Papa. “I hope that this event can be a sign of the inclusive world we want to build and that the athletes, with their sporting testimony, may be messengers of peace and valuable models for the young.”
Naghingyo man ini sang pagpangamuyo para sa kalinong.
“Let us not forget the martyred Ukraine, Palestine, Israel, Myanmar, and many other countries at war. Let us not forget, let us not forget, war is a defeat!” dugang sini.
Magasugod ang Summer Games sa Hulyo 26 kun sa diin ang opening ceremony sa River Seine ang magapakita sang parada sang 10,500 ka mga atleta kag masobra 100 ka heads of state and government.
TRADITION SANG OLYMPIC TRUCE
Tuyo sang tradisyon sang “Olympic Truce” nga mangin hilway sa katalagman ang partisipasyon sa Olympic Games. Sang una ini ginduso, para ini sa Greek city-states nga masami may kumplikto sa isa kag isa.
Sang 1990s, nagdesisyon naman ang International Olympic Committee nga buhion ang konsepto sang sini nga kasugtanan. Gindala na diri ang interes sang pangkabug-usan nga mga atleta kag mga hinampang kag agud nga matib-ong man ang gahum sang sports nga mag-promote sang kalinong kag pagpinatawaray.
