Ginakabig sang grupo sang transportasyon sa pungsod nga kadalag-an para sa ila ang hingyo sang Senado kay President Ferdinand Marcos Jr., nga suspendiron ang kontrobersiyal nga Public Utility Vehicle (PUV) Modernization Program tubtob masolbar ang tanan nga isyu kaangot diri.
Sa interview sang Bombo Radyo kay Mr. Elmer Forro, lead convenor sang No to PUV Phaseout Coalition Western Visayas, iya ginpahayag nga personal siya nga nagtambong sa hearing sang Senate committee on public services kaangot sa Public Modernization Act nga ginpangunahan sang chairman nga si Senador Raffy Tulfo.
Suno kay Forro, madugay na nila nga ginapamatukan ang PUV modernization plan bangud dugang nga palas-anon lang ini sa sektor sang transportasyon.
Kung mahimo suno sa iya, ibasura na lang ang PUV modernization kag magtukod sang bag-o nga programa nga inclusive, sustainable kag ang direksyon sini amo nga makahatag sang kasarangan nga serbisyo sa mga pasahero.
Apisar nagatuyo suno sa natungdan ang ‘jeepney modernization’ sang safe nga pagbyahe sa driver kag pasahero, dako naman ini nga pagpanghangkat sa pinansyal nga kapasidad sang mga driver.
Nalipay man ini bangud mismo si Senate President Francis Escudero ang nagtulod kay Sen.Tulfo nga mag-file sang resolusyon nga nagahingyo sa Presidente nga temporaryo nga suspendiron ang nasambit nga programa.
