ILOILO CITY – Wala sang dapat nga kabalak-an ang mga motorista matapos nakit-an ang mga litik sa ibabaw nga parte sang kontrobersyal nga P680 million nga Ungka Flyover.
Sa interview sang Bombo Radyo kay Engr. Sonny Boy Oropel, Director sang Department of Public Works and Highways (DPWH) Region 6, iya ginpahayag nga ang pagkalataktak sang semento halin sa naglitik nga porsyon sang flyover ang resulta sang rectification.
Suno kay Oropel, bangud nagpatigayon sila sang jet grouting, may paghulag sa portion sa parapet wall.
Ginpahayag sini nga gin-evaluate na ang lugar sa diin ang nahulog nga mga debris amo ang gin-finishing nga bahin sang flyover.
Sa masami nga paggamit suno sa natungdan sang flyover, nagakatabo ang vibration nga nagaresulta sa pagkalataktak sang semento.
Ginpasalig man sang natungdan nga mahisto ini sa tion nga matapos na ang phase 2 sang rectification.
