Nagsaka na sa 34 ang numero sang napatay sa Luzon bangud sa habagat kag paglaslas ni Bagyo Carina.
Sandig ini sa latest report sang Philippine National Police (PNP) kun sa diin nagapanguna ang kaso sang pagkalumos nga may 22, anum ang biktima sang landslide, lima ang nakuryente, kag isa ang natumbahan sang kahoy.
Suno kay PNP spokesperson Police Colonel Jean Fajardo, 18 ka mga indibidwal ang na-report nga nasamaran kasunod man sang paglaslas sang bagyo apang subject pa ini sa validation. Magluwas diri, anum pa ang ginapahayag nga missing sa nagkalain-lain nga mga lugar.
Sa pihak nga bahin, wala sang pagbag-o sa data sang casualties kun basehan ang National Disaster Risk Reduction and Management Council (NDRRMC).
Sa data sini nga amo gihapon halin sang Huwebes, 14 ang mga napatay sa Luzon kag Mindanao bangud sa bagyo kag habagat.
Base sa updated report sang talatapan, ang Butchoy, Carina, kag Habagat ang nag-apekto sa kabug-usan nga 1.31-million nga mga tawo sa tanan nga mga rehiyon sa pungsod magluwas sa Eastern Visayas.
