Ginkumpirma sa report sang Philippine National Police (PNP) nga isa ka aplikante sa Philippine Navy ang nasapwan nga patay sa sulod sang bag-o nga building site sang Senado sang Huwebes sang gab-i.
Suno sa Taguig City Police, nagaedad sang 23-anyos ang biktima, tumandok sang Maguindanao del Sur kag nagatinir sa Naval Intelligence and Security Force sa Fort Bonifacio.
May yara man sang testigo nga nagatinir sa amo man nga Navy facility nga nagpahayag nga nakit-an sini ang biktima nga nagsulod sa bag-o nga Senate building paagi sa Gate 1 sang construction site pasado 7:00 sang gab-i. Sang gin-alerto na sang testigo ang security guards, sunod nga nakit-an ang lawas sang biktima nga yara na sa duta.
Sandig sa nagaguluwa nga inisyal nga impormasyon, nahulog ang biktima halin sa north tower sang building.
Padayon pa ang imbestigasyon sa amo nga insidente suno pa sa kapulisan.
Nagmandu man sang separado nga imbestigasyon si Senate President Francis “Chiz” Escudero amo man sa pag-review sang security protocols sa construction site.
Sa separado naman nga statement, ginsiling sang Philippine Navy nga ang biktima ang kabahin sang ila nga civilian kitchen staff sa Bonifacio Naval Station kag yara na sa proseso sa pag-apply bilang myembro sang Navy. Nagpadala man sang mensahe sang simpatiya ang talatalapan kag nagpahayag nga maga-conduct man ini sang imbestigasyon.
