Ano ang imo himuon mo kun isa ka adlaw, gindeklarar sang iban nga tawo nga patay ka na pero sa pagkamatuod, you are “alive, awake, alert, and enthusiastic”?
Mahimo nga daw makahalam-ot man ini sa una, apang kun ikaw ang sa sitwasyon sining isa ka lalaki sa India, mahimo nga manginit ka man kun indi ka pagpatihan nga buhi ka pa matuod kag may kinamatarong pa sa imo nga mga propiedad.
Kaso ini ni Baburam Bhil, 40-anyos nga lalaki sa Mithora village sa Rajasthan sa amo nga pungsod diri sa Asya.
Tuman ang kakibot sini Sang may ginpaguwa nga death certificate kun sa diin nakasaad ang iya pangalan, gani gintilawan sini nga i-correct ang sala paagi sa pagpalapit sa ila village kag state authorities.
Pila ka beses niya ini ginhimo apang wala ginsapak ang iya apelar kag ang malain pa, ginkumpiskar sang gobyerno ang iya mga propiedad bangud sa rason nga patay na ang tag-iya.
Diri kag napinsaran na sini nga mangin bayolente kag maghimo sang krimen.
Bitbit ang isa ka kutsilyo, ginsulod sini ang isa ka eskwelahan, nag-eskandalo, napilasan pa sini ang duha ka manunudlo kag isa ka ginikanan kag sang ulihi, gin-hostage pa sini ang mga estudyante tubtub nga nag-abot ang mga pulis.
Sang gin-interogar na, ginpaathag ni Rajasthan nga pila ka beses na siya nag-hingyo nga i-annul ang iya death certificate apang wala siya ginpatihan rason nga nangin desperado siya kag naghimo na lang sang krimen.
Ginpinsar sini nga kun maghimo siya sang eskandalo, arestuhon siya sang otoridad kag mapilitan ang pulis nga ibutang ang iya pangalan sa record — pamatuod nga buhi siya kag indi pa patay.
Sunod nga ginpaidalom sa detention ang amo nga lalaki, apang “big win” ini para sa iya bangud nag-gana ang iya plano sang gin-anunsyo sang otoridad nga imbestigaran kun ano ka matuod ang iya ginpaguwa nga alegasyon.
