Ginasapar sang otoridad nga matapna na ang pagtagas sang langis kag malimpyuhan ang dagat sa Bataan kasunod sang paglugdang sang duha gid ka motor tankers.
Magluwas sa una na-report nga Terra Nova nga pakadto kuntani sa Iloilo apang naglugdang sa kalayuon nga 3.6 nautical miles sa Lamao Point sa Limay, Bataan sang nagligad nga Hulyo 25, naglugdang man ang MT Jason Bradley sa dagat nga sakop sang Barangay Cabcaben sa Mariveles.
Gina-check pa sang otoridad kun magkaangot ang insidente nga natabo.
Base sa inisyal nga impormasyon, ang Jason Bradley ang may karga nga diesel cargo apang indi maathag kun ano kadamo. Baliskad ini sa report sang shipping company nga wala sang karga ang vessel.
Suno sa Philippine Coast Guard (PCG), maga-imbestigar sila gilayon kun matapos na nga ma-recover ang cargo agud nga malikawan ang daku nga halit sa marine environment kag sa kaiping nga coastal communities.
Sa pihak nga bahin, ang Terra Nova ang kumpirmado man nga nagatagas sang industrial fuel oil. Naglab-ot naman ini kuatro kilometros halin sa Hagonoy, Bulacan coast kun basehan ang aerial photo nga kuha sang Greenpeace environment group.
Matandaan nga sang naglugdang ang Terra Nova sang Hulyo 25, may karga ini nga 1.4 million liters sang industrial fuel oil, 16 sa crew sini ang na-rescue, kag isa ang napatay.
