Nasaksihan sang tennis fans sa Paris, France ang ika-60 kag posible katapusan nga pag-atubangay sang duha ka tennis icons kag long-time rivals nga sanday Novak Djokovic sang Serbia kag Rafael Nadal sang Espanya.
Natabo ini sa second round sang men’s singles kun sa diin ginlutos sang 37-anyos nga top seed nga Serb ang nasambit nga 14-time French Open champion, 6-1, 6-4.
Buhi pa ang paglaum nga makadaog ang world no. 2 sang labing-una sini nga Olympic gold medal, samtang ang 38-anyos naman nga Spaniard ang magatutok na lamang sa nabilin sini nga hampang nga amo ang doubles competition kun sa diin partner sini ang bataon pa nga player nga si Carlos Alcaraz.
May mga nadismaya man bangud sa madasig nga pagdaog ni Djokovic apisar nga ginlauman kuntani ang epic match bangud ang duha ang makabig nga kabahin sa greatest tennis players sa maragtas — may 24 ka Grand Slam singles titles ang Serb samtang may 22 naman si Nadal.
Apisar nakitaan na ang paghina ang ikasarang sang Spanish superstar, wala sang kumpirmasyon kun san-o ang mangin katapusan sini nga hampang.
“I cannot live every single day with the feeling that it’s going to be or not going to be my last match,” pahayag sini sang ginpamangkot kaangot sa iya retirement. “I come here, I try my best, I play and when I decide to stop playing or when I decide to keep going I will let you know.”#
