Naatrasar ang flight sang mga pasahero lakip na ang masobra 70 ka mga kongresista sa Daniel Z. Romualdez Airport sa Tacloban, Leyte bangud sa isa ka bomb joke nga kahimuan sang 80-anyos nga Lola.
Natabo ini sa Philippine Airlines Flight PR2988 sang manug-alas syete na kagab-i.
Base sa inisyal nga mga impormasyon suno sa Civil Aviation Authority of the Philippines (CAAP), ginabuligan sang crew ang Lola samtang yara sa eroplano apang naglahog ini nga mabug-at ang iya luggage bangud may unod nga bomba.
Madasig ang pag-responde sang Avation Security Group kun sa diin ginpatigayon gilayon ang paneling kag inspeksiyon sa sulod sang aircraft.
Sa update sang CAAP, nakasakay liwat ang mga pasahero 8:05 PM kag nakaabot sa Ninoy Aquino International Airport (NAIA) Terminal 2.
Ang Lola naman nga naga-isahanon sa amo nga byahe ang wala anay gintugutan nga maglakat kag napaidalom subong sa kustodiya sang Philippine National Police Aviation Security Group.
Nahibaluan nga istrikto nga ginadumilian ang bomb jokes sa pungsod kun sa diin sandig sa Presidential Decree No. 1727, may penalidad nga pagka-preso sang indi magsobra sa lima ka tuig ukon multa nga indi magsobra sa forty thousand pesos (P40,000.00).
