Nangin maayo ang imbukada sang Agusto 3 para sa mga Pilipino sa Paris Olympics matapos nga nagdaog si Nesthy Petecio batok kay Amina Zidani sang France sa round-of-16 sang women’s 57kg weight class sa boxing.
Sulod na subong sa quarterfinals ang Pinoy pride nga Tokyo Olympics silver medalist kag pananglitan magpangibabaw pa gid sa masunod nga round, sigurado na ini nga makadala sang medalya para sa pungsod.
Apang antes sina, yari anay ang mga balantayan nga atleta subong nga Sabado.
OBIENA
Sa athletics, magasabak na sa kumpetisyon si Ernest John “EJ” Obiena 4:10 karon sa hapon (oras sa Pilipinas).
Para ini sa men’s pole vault qualification (Group A) kun sa diin kinahanglan sini nga malukso ang qualification standard nga 5.80 meters ukon dapat nga malakip sa 12 best performers halin sa 32 nga yara sa kumpetisyon.
Nagapangaduha si Obiena sa bug-os nga kalibutan sa patag sang pole vault subong kag siya man ang naga-uyat sang Asian record nga 6m apang mabudlay man ang banas para sa gold medal mission sini bangud yara man sa kumpetisyon ang defending Olympic champion nga si Armand Duplantis sang Sweden nga amo man ang world number one.
Magluwas kay Duplantis nga may world record nga 6.23m, yara man ang World Number 3 nga si Sam Kendricks sang USA.
YULO
Balantayan na 9:30 karon sa gab-i ang potensyal man nga medalist sang Pilipinas nga si Carlos Edriel Yulo.
Finals na ini sa Men’s Floor Exercise nga isa man sa pet exercise ukon forte sang Pinoy pride.
Tuyo ni Yulo nga makabawi matapos nga nagpang-12 lamang sa 24 ka gymnasts sa all-around finals sang nagligad nga gab-i.
PAALAM
9:46 karon sa gab-i, magasaka liwat sa ring ang Tokyo Olympics silver medalist nga si Carlo Paalam para sa quarterfinals sang men’s -57kg division.
Pananglitan magdaog si Paalam karon sa gab-i, sigurado na ini nga makaangkon sang bronze medal kag buhi man ang paglaum nga mapatasan sini ang iya nalab-ot sa Olympics sa Japan sang 2021 ukon mabulsa ang maila nga gold medal para sa Pilipinas.
Matandaan nga nag-abante si Paalam sa quarterfinals matapos ginlutos ang Irish fighter nga si Jude Gallagher sa Round of 16.
Ang kabug-usan nga rankings sang mga pungsod sa Paris Olympics ang mahimo malantaw sa official website sang Bombo Radyo Philippines nga amo ang www.bomboradyo.com kag sa official facebook page sang Bombo Radyo Iloilo.
