Sigurado na ang isa pa ka medalya para sa Pilipinas matapos nga nag-abante na si Nesthy Petecio sa semifinals sang women’s 57kg sa boxing sa 2024 Paris Olympics.
Unanimous ang desisyon sang judges pabor sa 32-anyos nga boksidor sang Pilipinas (30-27, 29-28, 30-27, 30-27 kag 29-28) batok sa tiglawas sang China nga si Zichun Xu sa quarterfinal match nga ginpatigayon pasado ‘las nueve subong nga gab-i (oras sa Pilipinas) sa North Paris Arena.
Misyon ni Petecio nga makasulod sa gold medal match kag madala pauli ang bulawan nga medalya agud nga malapawan ang silver medal finish sini sa Tokyo Olympics 2020.
Naghimo man siya sang rekord bilang ika-duha nga Pinay halin sa Pilipinas (sunod sa weighlifting ace nga si Hidilyn Diaz) nga nakabulsa sang back-to-back medals sa Olympiada.
Ang sure medal ni Nesthy amo ang nagdugang sa tally sang Pilipinas sa Paris Games matapos nakuha ni Carlos Yulo ang historic gold sa men’s floor exercise sa gymnastics kagab-i, kag (at least) bronze medal sang boxer nga si Aira Villegas nga abante naman sa semifinals sang women’s 50kg.
