Nagdangat sa 43 ang patay kag ginatos ang napilasan sa maduguon nga protesta sa Bangladesh samtang nga nagapanawagan ang protesters kay Prime Minister Sheikh Hasina nga manaog sa pwesto.
Napilitan man ang mga pulis nga maggamit sang tear gas kag rubber bullets bangud sa masingki nga protesta sang linibo ka mga tawo nga amo man ang ginakabig pinakadaku nga pagpanghangkat sa administrasyon ni Hasina.
Matandaan nga sang eleksyon pa lang kun sa diin nadag-an sini ang iya ikapaat nga sunod-sunod nga term, gin-boycott ini sang main opposition nga Bangladesh Nationalist Party.
Bangud sa gamo, nag-deklarar ang gobyerno sang indefinite nationwide curfew umpisa sa 6:00 sang Domingo. Na-shut down naman ang internet services sa pungsod.
Nagsabat naman si Hasina nga indi mga estudyante ang naga-protesta subong kundi mga terorista nga nagatuyo nga i-destabilize ang nasyon.
Sunod man sini nga ginpatawag ang national security panel meeting kun sa diin nakaupod ang mga hepe sang army, navy, air force, police kag iban pa nga ahensya.
MGA PILIPINO SA BANGLADESH
Gin-report naman sang Department of Migrant Workers nga safe ang mga Pilipino sa Bangladesh sa tunga sang kinagamo.
“Ang mga OFW in Bangladesh are mostly skilled workers, technical. And some of them in the hotel sector, hospitality sector. They are safe and sound at this stage and we hope it’s safe that way,” suno kay DMW chief Hans Cacdac. “So far, safe and sound ang around 700 Filipinos in Bangladesh.”
Sang Byernes sang ginpataas sang Department of Foreign Affairs (DFA) ang alert status sa Bangladesh sa Alert Level 1 ukon ang precautionary phase bangud sang political demonstrations kag civil unrest.
