Ginkalipay sang transport groups sa Iloilo ang pagpanindugan ni President Ferdinand ”Bongbong” Marcos Jr. nga dayunon ang Public Utility Vehicle Modernization Program (PUVMP) apisar may resolusyon ang Senado nga nagapanawagan sang suspensyon sang sini nga kontrobersyal nga programa.
Sa interview sang Bombo Radyo kay Raymundo ‘Boyet’ Parcon, chairman sang Western Visayas Transport Cooperative, iya ginpahayag nga nahaw-asan sila matapos ang pila ka gab-i man nga wala nakatulog bangud sa ginhimo sang 22 ka mga senador nga pagpirma sa proposed Senate Resolution 1096 nga nagahingyo sa gobyerno nga isuspend na ang amo nga programa nga kilala na subong nga Public Transport Modernization Program (PTMP).
Pananglitan nagsugot si Marcos sa ginhingyo sang mga senador suno kay Parcon, tawgon gid nila ini nga “butigon.”
Suno kay Parcon, antes pa man ang desisyon sang presidente, tuman gid sila ka dismayado sa tikang sang Senado bangud ginbalewala sila nga transport groups apisar sila ang nag-baka-baka sa pagtuman sang una nga mandu sang national government.
Akig ang sektor sang transportasyon sa upper chamber sang Kongreso ilabi na kay Senate President Chiz Escudero suno sa natungdan kag wala man sang lauman ang Senado nga boto halin sa ila sa eleksyon.
Gin-rason man ni Parcon nga kun “Bagong Pilipinas” ang gusto sang gobyerno, diri na kuntani nagasulod ang modernisasyon sa mga jeep kaangay man kun paano gina-modernize ang mga merkado sa Iloilo City.
“Kami nagtuman, kami nagbaka-baka, tapos ibalewala nila sa Senado? Amo na nga kami ya sa bilog nga Pilipinas nagdeklarar nga dapat ma-resign na ang tanan nga nagpirma [sa resolution],” suno kay Parcon.
Matandaan nga sang Lunes, naglunsar sang transport break ang transport groups sa Iloilo bilang protesta sa tikang sang Senado.
