Handa na ang Pinay weightlifter nga si Elreen Ando nga magbalik sa weightlifting stage sa Olympiada matapos ang debut sini sa Tokyo Olympics 2020.
9:00 karon sa gab-i sa South Paris Arena, magasugod ang kumpetisyon sa women’s 59-kilogram (kg) class kun sa diin tuyo sini nga malapawan ang iya seventh place finish sa Japan tatlo ka tuig na ang nagligad.
Matandaan nga ang 25-anyos nga Pinoy pride halin sa Cebu ang nangin balabag sa qualifications sa 2024 IWF World Cup sa Thailand rason kun ngaa wala nakasulod sa Paris Games ang Olympic gold medalist nga si Hidilyn Diaz.
Sang amo nga tion, nagpang-pito si Ando nga may final tally nga 228kg.
Sa bag-o sini nga weight category, indi mahapos ang banas para sa Cebuna ilabi na bangud makasumpong sini ang Tokyo gold medal winners nga sanday Kuo Hsing-chun sang Chinese Taipei kag Luo Shifang sang China.
Yara man ang World No. 3 nga si Maude Charron kag No. 5 Kamila Konotop sang Ukraine.
Ang iban pa nga kasumpong sini amo sanday Yenny Alvarez sang Colombia, Dora Tchakounte sang France, Janeth Gomez Valdivia sang Mexico, Mathlynn Sasser sang Marshall Islands, Lucrezia Magistris sang Italy, Anyelin Venegas Valera sang Venezuela, kag Rafiatu Lawal sang Nigeria.
As of press time, may apat ka medalya ang Pilipinas sa 2024 Summer Games — duha ang gold medals ni Carlos Yulo kag tag-isa ka bronze medal sanday Aira Villegas kag Nesthy Petecio.#
