Nakapanghawan na ang local government unit sang Tubungan, Iloilo matapos narusdak ang porsyon sang entrance arch sang Spanish-era cemetery sa amo nga banwa.
Sa interview sang Bombo Radyo kay Tubungan Mayor Roquito Tacsagon, iya ginpahayag nga ginsigurado man sang LGU nga wala sang may mahalitan ukon masamaran kun maglabay sa amo nga arko.
Suno kay Tacsagon, sang narusdak ang porsyon sang arko, gilayon siya nga nagpakig-angot sa Municipal Disaster Risk Reduction and Management Office, Municipal Engineering Office, kag simbahan.
Ginpa-assess man sang alkalde sa mga personnel agud mahibaluan kun may posibilidad pa gid madugangan ang porsyon nga marusdak agud nga mapreparahan man sang banwa kag ma-secure na ang area.
Ginahulat subong ang evaluation kag rekomendasyon sang engineer’s office.
Importante suno sa opisyal nga mabuligan gid ang pagkaayo gilayon sa arko bangud isa lang ang alagyan pasulod kag paguwa sa patyo kay may naka-schedule pa nga lubong sa weekend.
Daku man ang pagpabalor sang LGU sa amo nga patyo bangud kabahin na ini sang ila maragtas halin sang gintukod sang 1897.
(Photo: Tito Garcia)
