Gin-aresto sang mga pulis sa Paris, France ang Grammy-nominated hip hop star nga si Travis Scott bangud sa gamo nga ginkaulamiran sini sa isa ka luxury hotel batok sa isa ka security guard.
Suno sa Paris prosecutor’s office, ang involved nga security guard ang nagpatunga lang kuntani bangud una nga nag-away ang 33-anyos nga rapper kag ang iya kaugalingon nga bodyguard.
Wala pa sang ginpatpat nga impormasyon kun ano kadaku nga gamo kag kun ano nga klase sang pagpangsakit ang nahimo sang singer kag kun gin-detain ini sang otoridad.
Base sa reports sang pila ka French media, hubog si Scott sang natabo ang insidente.
Yara ini sa Paris agud maglantaw sa Olympic Games partikular sa men’s basketball semi-finals sa tunga sang United States kag Serbia.
Si Scott ukon Jacques Bermon Webster sa matuod nga pangalan ang bag-o lang gid nakatapos sa European leg sang iya Circus Maximus tour pila ka adlaw lang gid ang nagligad sa Lisbon, Portugal.
Matandaan nga antes sini, sang Hunyo, gindakop man ang music star sa Miami Beach bangud sa trespassing kag disorderly intoxication.
Magluwas sa iya talent sa music industry, kilala siya bangud sa iya Astroworld Festival show sang 2021 kun sa diin naglab-ot sa trahedya nga nagbilin sang 10 ka mga patay.
