Gin-anunsyo sang Gaza Civil Defense nga 93 na ang patay bangud sa pag-atake sang Israel sa eskwelahan kag mosque sa Gaza nga ginatiniran sang mga pumuluyo nga nawad-an sang mga balay bangud sa gyera.
Suno sa ahensya, nagapangamuyo gid ang mga tawo sa Al-Tabi’in compound sa Al-Daraj sa nasidlangan sang Gaza City sang gin-igu ini sang strike sang Israel — bagay nga ginkumpirma man sang Israel bangud naga-operate ang Hamas sa amo nga lugar suno sa militar.
Pahayag ni Gaza Civil Defense Spokesperson Mahmoud Basal, halos indi na ma-identify ang masobra 90 ka mga bangkay nga ila na-recover.
Naglalapta man ang mga lawas sang mga tawo partikular sang mga sibilyan, kabataan, tigulang kag kababainhan ilabi na bangud wala sang warning nga may strike nga himuon.
Nagdepensa naman ang Israel Defense Forces nga antes ang ila strike, may mga lihok sila nga ginhimo agud indi matam-an sa halit ang mga sibilyan kaangay sang paggamit sang precise munitions, aerial surveillance, kag intelligence information.
Base sa intelligence report sang Israel, 20 ka Hamas kag Islamic Jihad fighters ang naga-operate sa building nga ila gin-atake.
Nag-insister man ang militar nga binutig ang pahayag sang Gaza nga masobra sa 90 ang napatay.
Kasunod sang amo nga atake, nagpahayag si UN Special Rapporteur for the Palestinian Territories Francesca Albanese nga nagakomiter na gid sang genocide ang Israel sa Palestinians kag ginahimo nila ini sa mga ospital, refugee camp, mga eskwelahan, kag mangin sa safe zone sa Gaza.
