Opisyal na nga nagtakop ang Paris Olympics matapos ang masobra duha ka semana nga hinampang nga napun-an sang maragtas, inspirasyon, kontrobersiya, kag ispiritu sang pag-isa.
Ginpatigayon ang seremonya sa Stade de France umpisa ‘las tres kaina sang kaagahon oras sa Pilipinas kun sa diin ginabanta 9,000 ka mga atleta ang nagtambong kag gin-updan sang 270 ka performers.
Matapos ginpatukar ang national anthem sang France nga amo ang host nation, ginpasulod ang flag bearers sa stadium kun sa diin may tag-duha ka atleta nga magarepresentar sa kada pungsod kag magatindog sa palibot sang stage.
Sa Pilipinas, ang nagadala sang hayahay sang pungsod ang ang two-time gold medalist nga si Carlos Yulo kag ang bronze medalist nga si Aira Villegas.
Sa sini nga edisyon sang Olympiada, nakahingagaw-balik ang Estados Unidos sang Amerika sa pinakaibabaw nga pwesto sang medal tally inoras antes ang closing ceremony.
Nahimo ini paagi sa nangin makahalawat-hawat nga hampang sang women’s basketball team sa tunga sang Team USA kag host nga France.
Diutayan lang nakahimo sang upset ang French basketball players apang napunggan ini sang Americans kag nakuha ang kadalag-an sa isa gid lamang ka puntos, 67-66.
Ini na ang ila ikawalo nga sunod-sunod nga Olympic gold sa women’s basketball kag amo man ang ika-40 nga gold medal sang US sa medal table sa Paris Games.
Pareho ini nga numero sa 40 ka bulawan nga medalya sang China apang may 44 silver ang US kag 27 lamang ang China. May 126 medals overall man ang Americans ipaanggid sa 91 sang mga Chinese rason nga sila ang nagpanguna sa medal tally.
Ini na ang ika-apat nga sunod-sunod nga Olympiada nga nagpangibabaw ang USA.
PILIPINAS, NAGAPANGUNA SA SOUTHEAST ASIAN NATIONS SA PARIS
Nagpanguna naman ang Pilipinas sa mga pungsod sa Southeast Asia sa may pinakamaayo nga performance sa Paris Games.
Kadungan sang ika-100 nga pagpasakop sang pungsod sa Olympiada, maragtason man ang nakuha sini nga duha ka gold medals kag duha ka bronze.
Ang duha ka bulawan nga medalya ang pareho nga halin sa 24-anyos nga gymnast nga si Carlos Edriel Yulo nga nagkampyon sa vault kag floor exercise sa artistic gymnastics, samtang ang mga boksidor naman nga sanday Nesthy Petecio kag Aira Villegas ang nakabulsa sang duha ka bronze nga mga medalya.
Ini nga performance sang Pilipinas ang nakalapaw pa sa nahimo sini sa Tokyo Games kun sa diin may isa ini ka gold medal, duha ka silver kag isa ka bronze.
Sa Tokyo 2020, nangin best performing nation man ang Pilipinas sa Southeast Asia.
Ang Paris kag Tokyo Games ang nagamarka man sang labing-una nga tion nga nakaangkon ang Pilipinas sang multiple medals sa back-to-back Olympics.
Nagapangaduha sa Pilipinas subong nga tuig amo ang Indonesia nga may duha ka golds kag isa ka bronze.
Nagpangatlo naman ang Thailand nga apisar may anum ka medalya, isa lang ang gold. #
