Sa ikaduha nga tion sa sulod sang duha ka tuig, gindeklarar sang World Health Organization (WHO) nga isa ka global public health emergency ang mpox kasunod sang outbreak sa Democratic Republic of Congo kag madasig nga naglapta sa kaiping nga mga pungsod.
Ang deklarasyon ang kasunod man sa pagsinapol sang emergency committee agud nga abisuhan si WHO Director-General Tedros Adhanom Ghebreyesus kun may yara bala sang dala nga public health emergency of international concern ang amo nga disease outbreak.
Makalaton ang mpox paagi sa close contact.
Masami nga mild ang mga kaso sini nga viral infection apang may yara man sang panalagsahon nga kaso nga makamamatay.
Ang malatnan sini nga balatian ang makitaan sang sintomas sang trangkaso kag pus-filled lesions sa lawas.
Nahibaluan nga halin sa Congo, naglapta ini pati sa Burundi, Kenya, Rwanda kag Uganda rason man sang lihok sang WHO.
Antes sini, ang top public health body sa Africa ang nagdeklarar man sang mpox emergency sa kontinente matapos ang warning nga nagalapta ang balatian sa makaalarma nga kadasigon.
