ILOILO CITY-Nagpasar sang resolusyon ang Municipal Council sang Pavia nga naga-request sa MORE Electric and Power Corporation (MORE Power) nga gilayon nga ipatuman ang expansion sang ila operasyon sa amo nga banwa kag i- explore ang potensyal para sa Joint Venture Agreement upod sa Iloilo Electric Cooperative 1.
Sa interview sang Bombo Radyo kay Sangguniang Bayan Member Jose Maria Pyt Trimañez, iya ginpahayag nga ang resolution isa ka dako nga tikang kasunod sang pinakaulihi nga ruling sang Supreme Court nga nagapabakod sa constitutionality sang franchise sang MORE Power kag nagabasura sang claims sang Iloilo Electric Cooperative 1 tuhoy sa exclusive service rights.
Suno kay Trimañez, ang desisyon nagapahanugot sa MORE Power nga dayunon ang expansion nga suportado naman sang Republic Act 11918, nga napasar sang kongreso kag sang senado sang 2022.
Ginsiling man sang opisyal kag nasaad man sa resolusyon nga ang mas manubo nga electricity rates sang MORE Power kun ipaanggid sa ILECO 1 ang dako nga bentaha sa mga pumuluyo.
Magluwas sa Pavia, sakop man sang mangin expansion sang MORE Power ang 14 ka mga banwa kalakip man ang Passi City.
