Ginkumpirma sang Pakistan nga naka-rekord naman ini sang isa ka kaso sang mpox virus isa ka adlaw matapos na-detect man sa Sweden ang amo nga infection nga ginatudlo naghalin sa variant nga naangot sa recent outbreak sa Africa.
Suno sa Pakistani Ministry of Health, indi pa subong matumod kun ano ang mpox strain ang nag-resulta sa kaso sang 34-anyo nga pasyente.
Na-detect ang virus sa northwestern province sang Khyber Pakhtunkhwa kag napadala naman ang samples sa Islamabad para sa genetic sequencing para mahibaluan ang variant.
Sang Huwebes, matandaan nga gin-anunsyo sang Sweden nga mas delikado nga variant ang ila nadiskubrehan sa ila infected patient nga amo ang Clade 1.
Madasig ini nga maglapta paagi sa close contact kag naangot sa makamamatay nga pagtimbuok sang kaso sa Democratic Republic of the Congo (DRC) nga nag-umpisa sang Septyemre.
Ang Swedish case amo ang una nga infection sa guwa sang kontinente sang Africa suno sa Sweden Public Health Agency.
Natukiban nga na-infect ang pasyente bangud nakabisita ini sa Africa kun sa diin may major outbreak sang mpox nga Clade 1.
Sa una nga outbreak sang 2022, mas matahaw ang variant ukon kilala nga Clade 2 nga endemic sa West Africa kun sa diin nagresulta ini sang 140 deaths kag 90,000 cases kun sa diin kalabanan amo ang gay kag bisexual men.
Sang Myerkules sang gindeklarar sang World Health Organization (WHO) nga isa ka public health emergency of international concern ang paglapta sang mpox kasunod sang pagpanglakaak sang kaso sa Congo nga naglapta sa Burundi, Kenya, Rwanda kag Uganda.
