Nagpanindugan ang Pilipinas nga indi sini pagkuhaon ang barko sang Philippine Coast Guard (PCG) nga nagabantay sa Escoda Shoal apisar pa sang diplomatic protest nga gin-file sang China.
Suno kay PCG spokesperson for the West Philippine Sea Commodore Jay Tarriela, ang Escoda Shoal ang sulod pa sa exclusive economic zone (EEZ) sang Pilipinas gani may kinamatarong gid ang PCG nga mag-operate sa amo nga area.
Base ini suno kay Tarriela sa United Nations Convention on the Law of the Sea kag sa 2016 arbitral award.
Pahayag pa sini, wala na nagakinahanglan ang ila barko nga magpangayo pa sang permiso sa bisan ano nga pungsod para nga maka-operate sa lagoon sang Escoda Shoal.
“Our Philippine Coast Guard vessels have the right to operate within the lagoon of Escoda Shoal for as long as necessary, without requiring permission from any other country,” statement sini sa X (formerly Twitter.)
Dapat man suno kay Tariella nga untaton na sang China ang pag-cite sa 2002 Declaration on the Conduct of Parties in the South China Sea bangud una sa tanan, wala man ginakilala ukon ginasunod sang Beijing ang bisan isa ka probisyon sa amo nga deklarasyon bangud sila mismo ang nagapadala man sang ila nga Coast Guard vessels nga ginaupdan pa sang Chinese Maritime Militia.
Dugang dira suno pa sa natungdan, may naval assets pa gid sila sa Escoda Shoal nga amo ang nagadabok sang tension sa West Philippine Sea.
“China should stop citing the 2002 Declaration on the Conduct of Parties in the South China Sea, as they have not honored or followed a single provision of that declaration,” dugang sini.
Ginpaathag man sini nga ang pagdeploy sang BRP Teresa Magbanua sa Escoda Shoal ang wala nagatuyo nga magpasaka sang tension kundi agud protektahan ang sovereign rights sang Pilipinas sa sini nga katubigan particular na batok sa illegal, unreported, and unregulated activities nga nagahalit sa marine environment.
Matandaan nga si Chinese Foreign Ministry Spokesperson Lin Jian ang nagsiling nga iligal ang pag-estasyon sang Pilipinas sang barko sa Escoda Shoal bangud ni nga lugar ang ginatawag sang China nga Xianbin Jiao nga kabahin suno sa ila sang Nansha Qundao ukon Spratly Islands.
Sa panindugan naman sang Pilipinas, ang Escoda Shoal ukon kilala man nga Sabina Shoal amo ang coral reef formation nga nahamtang 70 nautical miles halin sa mainland sang Palawan kag maathag nga sulod pa sa exclusive economic zone sang pungsod.#
