Nakabulig ang maabtik nga koordinasyon kag pagbinuligay sang mga otoridad sa Indonesia kag Pilipinas kun ngaa natigayon nga madakpan ang duha sa mga kaupdanan ni anay Bamban, Tarlac Mayor Alice Guo kag nadala-pabalik diri sa pungsod.
Sandig sa impormasyon nga ginpaguwa sang Indonesian Ministry of Law and Human Rights, nakasaad nga nakit-an sang immigration officers ang makaduluda nga “foreigners” sa isla sang Batam rason nga nagpakig-angot gilayon sa isa pa ka ahensya para nga matumod ang ila nga mga identity.
Sa dalayon nga review, na-identify sila nga amo sanday “Sheila Guo” kag “Cassandra Li Ong” nga yara sa sulat sang Pilipinas sang ginpahibalo sini sa Jakarta ang kaso ni Alice Leal Guo ukon Guo Hua Ping nga nagpalagyo kag na-report nga yara sa Indonesia kag may mga kaupdanan.
Martes, Agusto 20, sang gindakop ang duha sa Mega Mall Batam Center apang wala na-aresto ang dismissed mayor kag ang isa pa ka utod sini nga si Wesley.
Suno kay Bombo Ginavella Limpin Cumla, international correspondent sa Indonesia, halin sa Singapore sanday Sheila kag Ong kag nagtabok sa isla sang Batam paagi sa cruise ship.
Madamo ang mga tawo sa Batam bangud isa ini ka ka urban kag industrial zone kag amo man ang pinakamalapit nga Indonesian Island sa Singapore kag sarang mabyahe sa sulod lamang sang 45 tubtub 70 minutos.
Nagaguwa man nga may nagbulig pa sa ila samtang yara didto bangud isa ka tawo ang nag-book sang apat ka mga kuwarto sa Harris Hotel Batam Center sa sulod sang tatlo ka adlaw
Nakasaad sa report ni Indonesian Director of Immigration Supervision and Enforcement Safar Godam nga nakit-an sa surveillance cameras nga ang Singaporean national nga si ZJ ang naghikot sang hotel reservations.
Padayon ang pagbulig sang Indonesian authorities agud nga matultulan man sanday Alice Guo kag si Wesley nga ila gintawag nga mga pugante.
DIIN SANDAY ALICE KAG WESLEY?
Kun ang Presidential Anti-Organized Crime Commission (PAOCC) ang pahambalon, ginapatihan nga yara pa ang anay alkalde kag ang iya utod sa Batam.
Suno kay Cumla, posible nga mas mahapos sa otoridad nga madakpan ang duha kun yara pa matuod sila sa isla, apang daku naman nga pagpanghangkat pananglitan makasaylo sila sang lokasyon kag pilion nila ang lugar nga mas magamay ang tawo bangud mainit na sila sa mata sang otoridad.
Nagguwa naman sa report sang PAOCC nga ang Singaporean national nga nagbulig kanday Ong kag Sheila sa Batam ang wala man sang liwan kundi amo ang anay presidente sang Lucky South 99 nga isa ka illegal nga POGO hub sa Porac, Pampanga kun sa diin si Ong amo ang authorized representative.
Pasado alas singko kaina sang hapon sang nadala-pabalik sa Pilipinas sanday Sheila kag Ong kag subong napaidalom sa kustodiya sang Bureau of Immigration.
