Gintumod sang Department of Health (DOH) nga late nga detection kag atrasado nga treatment ang rason sang kadam-an sang kamatayon sa Western Visayas nga naangot sa dengue.
Sa record sang Infectious Disease Section sang DOH Region 6, nakasaad ang apat sa sini nga fatalities ang napagkit halin sang Agusto 5-10.
Kabahin man ini sang nagatimbuok nga 12,198 cases sa bug-os nga rehiyon as of August 10 nga mas mataas sa masobra lamang 5,000 cases sang nagligad nga tuig.
Suno kay Dr. Bea Natalaray, head sang Infectious Disease Section, mas ginpabaskog pa gid sang talatapan ang kampanya para nga mapalab-ot sa publiko nga importante gid ang temprano nga konsultasyon kun nakit-an na ang sintomas sang dengue.
Kadam-an sa nagakapatay suno kay Natalaray ang mahina kag malala na ang kondisyon antes pa man dal-on sa medical facilities.
Bilang pag-monitor sa bug-os nga rehiyon suno sa natungdan, may serye sang meetings sa mga probinsya kag syudad para sa dengue outbreak response kag preparasyon; capacity building sa health workers para sa clinical case management; kag ang vector surveillance trainings para sa sanitary inspectors bangud kinahanglan man ang pag-resurvey sang naga-exist nga species sang lamok sa komunidad nga amo ang nagadala sang dengue virus.
Sa bug-os nga Rehiyon VI, nagapanguna sa may pinakamataas nga kaso ang Iloilo Province nga may 4,754.
