Ginbasura sang Timor-Leste ang apelar sang pugante nga anay mamalidha nga si Arnolfo “Arnie” Teves, Jr. batok sa extradition request sang gobyerno sang Pilipinas nga amo ang maga-deport sa iya kag magapabalik sa iya diri sa pungsod agud atubangon ang iya sampaw-sampaw nga mga kaso.
Suno sa Department of Justice (DOJ), nabaton nila ang update kaangot sa desisyon sang Timor-Leste Court of Appeals nga amo ang opisyal nga nag-deny sa motion for reconsideration nga gin-file sang kampo ni Teves.
Natalana pa nga iplastar sang justice department kun ano ang masunod nga lihok matapos nga ginpaboran sang Timor-Leste ang Philippine government.
Matandaan nga sang Hunyo sang nagdesisyon ang amo nga pungsod nga i-grant ang hingyo sang Pilipinas nga ibalik sa Manila si Teves, apang bangud may due process, nahatagan sang tyansa ang anay kongresista nga maka-apelar sa amo nga desisyon.
Ginkalipay naman ni Justice Secretary Jesus Crispin Remulla ang desisyon sang korte kag isa ini ka pagpakita suno sa iya nga may hustisya gid nga mahatag apisar anuman ang estado sang tawo.
Nahibaluan nga si Teves nga anay congressman sa Negros Oriental ang isa sa nagapangatubang sang kaso nga murder kaangot sa kamatayon ni Negros Oriental Gov. Roel Degamo sang 2023.
Napaidalom siya sa kustodiya sang Timor Leste police halin sang Marso matapos nga nadakpan siya sandig sa International Criminal Police Organization (Interpol) red notice nga ginpaguwa sang Pebrero.
Magluwas nga naangot sa kamatayon ni Degamo, nakasuhan man si Teves sang murder bangud sa separado pa gid nga kamatayon sang tatlo ka mga tawo sa Negros Oriental sang 2019.
Napalayas siya sa Kamara sang Agusto sang nagligad nga tuig bangud wala na ini nagasipot sa trabahon sa lower chamber apisar nga expired na ang iya nga travel authority.
