Ginpangpaskil sang Philippine National Police (PNP) ang “wanted” posters sang self-proclaimed Appointed Son of God nga si Pastor Apollo Quiboloy sa palibot sang compound sang Kingdom of Jesus Christ (KOJC) sa Davao City.
Ini sa tunga sang panawagan sang mga miyembro sang religious group nga magbiya na sa compound ang linibo ka kapulisan bangud ini na ang ika-siyam nga adlaw sang operasyon kag wala man gihapon nakit-an ang pastor kag mga kaupod nga akusado.
Nag-insister ang mga abogado sang grupo nga wala sang kinamatarong ang mga pulis nga magpangtapik sang poster sa pribado nga propiedad. Ginkabig naman ini ni KOJC chief legal counsel Israelito Torreon nga isa ka sahi sang harassment.
“The clear intention there is not to inform, it was designed to harass, not to inform, agitate…this is a clear case of harassment,” suno kay Torreon.
Sa pihak nga bahin, nagpanindugan naman ang Police Regional Office XI baliskad sa posisyon sang KOJC. Pahayag sang mga pulis, para lamang sa awareness ang ila nga pagpangtapik sang posters.
”Hindi naman tayo ipinanganak kahapon, what is the purpose….that is for awareness purposes. This is the information that the public need to know, hindi ito fake news,” suno kay PRO XI Special Task Force Teknon Alpha spokesperson Police Brig. Gen. Roderick Alba.
Padayon naman subong ang panawagan sang grupo sa PNP nga kuntani maghalin sila sa cathedral kag sa Jose Maria College building sa compound bangud kinahanglan nga ma-akomodar ang ila mga myembro nga maga-selebrar sang 39th founding anniversary sang religious group.
