Naglapaw na sa 18,000 ang numero sang dengue cases sa Western Visayas subong nga tuig.
Ini base sa data sang Department of Health Western Visayas Center for Health and Development (DOH WV CHD).
Suno kay Dr. Bea Camille Natalaray, Medical Coordinator for the Emerging and Re-emerging Infectious Disease Cluster sang ahensya, ini matapos nakarecord sang 2,368 nga bag-o nga kaso sa 34th Morbidity Week.
Sa subong, yara na sa 18,056 ang kabilugan nga kaso nga may 42 recorded fatalities humalin sang Enero 1 tubtob Agusto 24, 2024.
Dugang pa, may yara sang panibag-o nga 11 ka napatay sa pinakaulihi nga update.
Nagapabilin naman ang Iloilo nga may pinakamataas nga kaso nga yara sa 7,020 kag 20 ang patay; Negros Occidental nga may 2,864 cases kag walo ang patay; Aklan nga may 1,919 cases kag duha ang patay; Capiz nga may 1,828 cases kag lima ang patay; Guimaras nga may 1,446 cases kag isa ang patay; Antique nga may 1,012 cases kag isa ang patay; Iloilo City nga may 1,118 cases kag apat ang patay; Bacolod City nga may 849 cases, kag isa ang patay.
Kalabanan sa apektado ang mga indibidwal nga nagaedad 11 tubtob 20 anyos nga yara sa 6,203 cases.
