Indi matakos ang yuhom ni Police Regional Office – Davao Director Brigadier General Nicolas Torre III sa nangin kadalag-an sang ila misyon sa Kingdom of Jesus Christ (KOJC) compound sa Davao City.
Suno kay Torre, nahaw-asan gid siya kag makabawi na gid man sila sang tulog matapos ang masobra duha ka semana nga pagtinir sang 2,000 nga mga pulis sa amo nga compound.
Pahayag sini, unahon gid niya ang pasalamat sa mga kapulisan sa Police Regional Office XI, kag maghalad man sang bulak sa iya nagtaliwan nga amay nga amo ang iya inspirasyon sa amo nga misyon.
Nagpasalamat man si Torre mangin sa mga miyembro sang KOJC apisar nga nangin tensyonado ang masobra duha ka semana nila nga operasyon sa compound.
Sang amo nga tion, wala-tuo ang mga akusasyon sa pulis nga naggamit sang tear gas kag long-range acoustic device ukon LRAD kag gina-alegar naglapas na sang kinamatarong sang mga miyembro sang grupo. May reports man ang pulis nga ginhaboy na sila sang bato kag ginbasyahan sang mabaho kag mapangsot nga tubig.
Sa pihak sini suno kay Torre, gusto niya klaruhon nga indi sini kontra ang KOJC kundi ginahimo lang niya ang iya obligasyon.
“I don’t believe na magkaaway kami ni (that I am enemies with) Atty. Torreon. I would like to believe na (that) we’re just playing our roles. He played his role, I played my role and it turned out well,” pahayag ni Torre.
Ginatugyan naman sini kay Interior Secretary Abalos ang pagdetalye sa pagsungka ni Quiboloy.
Apang pahayag sini, wala sang bisan isa ka bes nga nagduha-duha siya nga wala sa compound ang pastor apang nadugayan lang sila bangud sa kadakuon sang compound kag ginkinahanglan pa nga tun-an ang pasikot-sikot.
Ginsiling man sini nga insakto sila kaangot sa lokasyon ni Quiboloy apang wala na nag-detalye pa.
Matandaan nga gin-ako anay nanday Torre nga napaslawan sila nga makakita sang entrada sa underground bunker kun sa diin may na-detect nga heartbeats kag senyales sang kabuhi, gani nagkutkot sila sang underground tunnel sa basement sang Jose Maria College nga isa sa mga estruktura sa lugar.#
