Nag-file sang reklamo si anay Presidente Rodrigo Duterte batok kanday Department of the Interior and Local Government (DILG) Secretary Benhur Abalos kag Philippine National Police (PNP) Chief General Rommel Marbil kasunod sang operasyon sang mga pulis sa Kingdom of Jesus Christ (KOJC) compound sa Davao City.
Suno kay Abalos, duha ka counts sang malicious mischief ang ginpasaka batok sa iya, kay Marbil, kag iban pa nga police officials nga nagpatuman sang operasyon batok kay Pastor Apollo Quiboloy.
Kabahin lamang ini sang mga reklamo nga ila ginaatubang bangud sa masobra duha ka semana nga pagsulod sa KOJC agud nga dakpon ang pastor kag iban sini nga kaupdanan nga akusado.
Yari ang tanan nga petitions and complaints base sa gin-presentar ni Abalos sa press briefing, Septyembre 9:
- petition for writ of amparo and habeas corpus data pabor sa mga miyembro sang KOJC
- violation of domicile, interruption of religious worship, offending the religious feelings, kag grave threats sa idalom sang Revised Penal Code amo man ang administrative complaint para sa grave misconduct, grave abuse of authority and/or conduct unbecoming of a public officer
- malicious mischief nga ginpasaka ni Duterte batok kay Abalos, Marbil, kag iban pa nga pulis (two counts)
Suno kay Abalos, nagapanan-aw na sila nga madugangan pa ini nga kaso bangud nagpaandam si KOJC legal counsel Atty. Israelito Torreon may lain pa gid nga mga panumbungon nga i–file.
“Sinabi nga ng counsel niya, binantaan kaming dalawa na maski magre-retire daw siya, katakot-takot na demanda ang aabutin daw namin, kaming tatlo,” pahayag sang tiglikom.
Si Quiboloy nga founder kag leader sang KOJC ang nagsungka na sa otoridad sang Domingo sang hapon matapos ginhatagan sang PNP sang 24-hour ultimatum. Yara na ini subong sa kustodiya sang PNP sa Camp Crame, Quezon City.#
